وكلهم بلا استثناء ميعرفوش إبني فين من الأساس, استنيت أكتر من تلت ساعات يمكن بيشتري حاجة من تحت بس برضه مجاش, غير إنه بينام يوميا لحد بعد الضهر, ولو هينزل في مشوار كنت أكيد هبقا عارفة..
وعلى العصر بدأ القلق ينهش في قلبي أكتر وأكتر, فكرت أبعت لأبوه بس كنت مترددة جدا, الراجل في بلد تانية واستحالة ينزل في يوم وليلة, وحتى لو ده حصل, هبقا دمرت له شغله كله,.
صليت ركعتين لله عشان يرد الغايب ويرفع عننا الكرب ده, دخلت الحمام من تاني وبدأت أفتش عن أي حاجة تدلني على مكانه, .
وفعلا لفت نظري شيء عجيب أوي, أثر كف ضبابي على المراية, معرفش ازاي مشفتوش الصبح, تأملت الأثر كان قريب من حجم إيد ابني, قربت بعنيا من أثر الكف وفجأة
ظهر أثر تاني على المراية اللي اتهزت بعنف, كأن فيه حد وراها وبيزقها عليا, كتمت صرختي بالعافية وخرجت اجري من الحمام..
فضلت أتنفض يجي نص ساعة برة, ولما دخلت من تاني كانت كل حاجة اختفت, مفيش أثر لأي كف, خرجت واتصلت بأخويا الكبير وعرفته إن ابني مختفي من الصبح,.
جه يجري وطبعا خبيت عليه موضوع الهدوم والفيلم الإباحي والمراية, قالي أخبي الخبر عن جوزي عشان منقلقوش في سفره لحد بكرة بس, وهو هيروح القسم يبلغ ويسأل في المستشفيات القريبة, وبدأ يطمني انه مش صغير ده شاب عنده 16 سنة وأكيد هيعرف يرجع لوحده..
كان وقتها الليل داخل علينا, قرأت قرآن شوية واستنيت أي خبر يجيلي من أخويا, ساعة واتنين وتلاتة ومفيش أي خبر, ولما كلمته قالي انه لسة بيلف على المستشفيات وان قسم الشرطة قال لازم يمر على الاختفاء 24 ساعة على الأقل عشان نعمل بلاغ,.
فضلت أدعي كتير وغصب عني بدأت دموعي تنزل مني, ووسط كل ده بدأت أسمع صوت غريب أوي جاي من الحمام, كأن حد بيتخانق جوة بصوت مكتوم, أو كأن حد متكمم ومش عارف يتكلم فعمال يصيح بأي كلام..