بعد الولاده تعبت وجالى حمه نفاس، حرفياً بموت ماما جت تقعد معايا، كتر خيرها سابت اللى وراها علشانى وياريت تمر، من اول يوم عمر جوزى حكم عليه متدخلش المطبخ ولا تحط ايدها فى الأكل

كان صوته عالى وهو بيقولى، يا هانم امك عندها فيروس سى، انا خايف لا تعدينا، بقيت اكتم بوقه علشان متسمعش، حاولت أفهمه ان الفيروس مش بيعدى غير عن طريق الدم وانا من ناحيتى هحرص بس هو صمم على كلامه، انا اتحرجت ومتكلمتش مع ماما فى اى حاجه، لأنه مينفعش

رغم تعبى بس كنت بقوم واحاول انفذ كلام عمر ليه، مكنتش عاوزه مشاكل معاه وخصوصا الموضوع حساس ويجرح امى

كنت ادخل المطبخ واحلف عليها اعمل انا الأكل
اليوم كان بيعدى عليه بسنه، لحد ما زاد عليه التعب، مبقتش قادره، ابتدت ماما تعمل الأكل وتتصرف هى فى البيت

انا مريم 30 سنه معهد خدمه اجتماعيه متزوجه من عمر بكالوريوس تجاره، يمتلك محل أدوات منزليه فى نفس العماره، مخلفه منه ايسل

3 سنوات وأنس عمره اسبوع، ساكنه فى بيت عيله مكون من حماتى وسلايفى نشوى زوجه

وائل”الاخ الكبير” ومعاها ولد، من يوم ما حملت وهى هتتجن وتحمل تانى، اما سلفتى التانيه فيفى كانت جارتى ودى بقى بدلعها وبقولها يا فوفه لأنها بنوته 19سنه بعتبرها زى اختى ، أنا اللى اخترتها لسلفى أشرف “الاخ الاصغر” اصلها يتيمه اب وأم ،عايشه مع اخواتها البنات وكلهم كانوا متجوزين ،على طول كانت بتشتكى منهم ومن شقاوه ولادهم

كانت بتقولى أنها بتروح تبات عند كل واحده فيهم شويه علشان متقعدش لوحدها

وطبعا كانت بتصرف معاشها عليهم وعلى ولادهم
صعبت عليه وعرضتها على سلفى ،بعت حماتى معايا ولما شافتها ،قالت أنها شكلها ضخمه عليه اصلها طويله ومليانه ،اما أشرف نحيف وطويل

بس لما شافها أعجب بيها، تم الزواج فى اققل من شهرين وبعدها سافر بلد عربى يشتغل. ابتدت ماما تشوف شغل البيت وغير حماتى كانت تنزل تقعد معانا بالساعات وماما تخدمها اصلها ست جامده وقويه